লেডি গদাইভাৰ হাঁহি
এটা হাঁহি শুনিলো-
হাঁহি নহয় অট্টহাঁহি৷
সেই হাঁহিৰ শৱদত
উলংগ হৈ পৰিল ৰজা
প্ৰজা হৈ পৰিল বিবস্ত্ৰ৷
চাতুকাৰ, সমালোচক
বিদুষক, বুদ্ধিজীৱী-
সকলোৰে লেঙুতি হ’ল
সোলোক ঢোলোক৷
চিঞাহী নোহোৱা কলম হাতত লৈ
কটকী সাজু হ’ল
লিখিবলৈ এক বিস্ফোৰক প্ৰতিবেদন,
পাঠ কৰিবলৈ এক আবেদনময় ’ব্ৰেকিং নিউজ’৷
নগ্ন ইতিহাসক বিকিনি পিন্ধাবলৈ
দিগম্বৰ বুৰঞ্জীবিদ সকলো জঁপিয়াই উঠিল৷
মহাবাহুৱে কুতুৰিলে
তেওঁক হেনো আৰু এটা
“ৰিঞ্জাৰ লেক্টেট” লাগে৷
এখন আইনাৰে শৰীৰ ঢাকি
লেডি গদাইভা পাৰ হৈ গ’ল৷
আৰু আমি শুনিলো এটা
চাইলেন্সাৰযুক্ত অট্টহাঁহি৷
সকলোৱে নিজকে দেখিলে সেই আইনাত৷
কুঠাৰে হেনো বেজীক নাহাঁহে-
গুৰুজনৰ বাণী৷
০৮.১২.১৪
